هنآ أضع أفكـــاري ، ليستفيد منها الجميع ^ ^

السلام عليكم و رحمة الله و بركاته

حياكم الله .. هنا أحببت أن أضع لكم مجموعة من أفكـــاري التي استنبطتها أو أخذت مضمونها من خلال بعض تجاربي في هذه الحياة ..! و هدفي من وضعها : ليستفيد منها الجميع في وجه الخير إن شاء الله ^_^

* استخدمت هنا ( اللغة العامية ) بكثرة

لتسهيل عملية إيصال الفكرة !!

حملـة " إلا صلاتي " في حاجة لـ أفكـار إبداعية !

أفكااااااااااااااااااري :

- الفكرة (1) :
تسوون مثل بازار ( أو معرض ) صغير في الفسحة .. أو في وقت الحصص الإضافية .. تبيعون فيه أشياء تخص موضوع الصلاة .. مثل كتيبات أدعية - أذكار - / أشرطة دينية - محاضرات - أناشيد (تخص الصلاة ) و الأفضل تكون الأناشيد بدون إيقاع !..

- الفكرة (2) :

تجمعون أناشيد تتكلم عن موضوع الصلاة .. و تنسخونهم في سيديهات (CDs) و تكون أغلفة السي دي مرتبة و متناااسقة .. و الأجمل انكم تحطون عليه صورة ولد او بنت يصلون أو سجادة أو اي صورة تدل على الصلاة يعني .. و تكتبون على السي دي .. كلمات نشيدة عن الصلاة أو ذكر أو دعاء .. ( بس بطريقة حلوة و ألوان بنوتية تجذب كل البنات ^ ^ ) ... و تبيعونهم في المعرض اللي بتسوونه في الفكرة (1).

- الفكرة (3) :

حلو لو انكم تيبون ولد صغير (طفل ) ممكن يكون في المرحلة الإبتدائية .. و يصلي فيكم إمام طول أيام الأسبوع .. أو يوم ع الأقل يصلي بكل بنات المدرسة .. و يكون في المسرح .. و تحطوله مكروفون عسب صوته ينسمع لكل البنات في المسرح .. حتى المعلمات خلوهم يصلون معاكم .. و الكل أكيد راح يتشجع يصلي لأنه طفل يصلي في الجميع .. فكرة حلوة و يديدة .. =")

- الفكرة (4) :

تشترون مجموعة سيااايييد و وقي خاصة بالصلاة (جمع سجادة و جمع وقاية صلاة ^ ^") و لو حبيتوا تضيفون واياهم دخون و مدخن صغير (كحركة يعني) و توزوعونها على المعلمات في المدرسة و حتى الإدارة (المديرة و الوكيلة و الإخصائية و السكرتيرة .. ) لا تنسونهم .. بيستانسون منكم و يدعولكم بالخير ^_* ..

- الفكرة (5) :

تسوون برآشرز ( الدواوير اللي يحطونهم في الثياب ) من صنع أياديكم الحلوة .. و تطلعون إبداعاتكم فيهم .. مم تكتبون فيهم مثلاً : إلا صلاتي أو/ صلاتي .. هي حياتي أو / صلاتي .. أهم شي في حياتي أو/ صلاتي .. نجاتي .. و غيرهم من العبارات الحلوة .. و طبعاً بتنسيق و ألوان حلوة ^_^

- الفكرة (6) :

توزعون لكل صف .. ( لوحة بيضاء أو أي لون فاتح (وسيلة) - صمغ - أقلام فلوماستر (ألوان) - ألوان - خيوط صوف ملونة - قص و لصق - . . . و غيرهم من الأشياء اللي تحسونها لازم يستخدمونها في عمل الأشغال اليدوية ..) و تطلبون من كل صف .. انهم يسوون بوستر عنوانه ( إلا صلاتي ) ... يعني يبدعون في عمل البوستر .. مثلا يرسمون ولد واقف على سجادة و يصلي و السجادة من الخيوط يسوونها .. المهم يطلعون أفكاااارهم كلها عن الصلاة .. ( يعني يطلعون حرتهم في اللوحة اللي جدامهم ^ ^) و هكذا ..
* يعني ملخص الفكرة : انه كل صف يسوي بوستر بتعاون كل بنات الصف في صنعه و في نهاية الإسبوع في الطابور تكرمون أجمل ثلاث بوسترات سووهم البنات على مستوى المدرسة ..

- الفكرة (7) :

تسوون توزيعات على البنات و المعلمات .. نشرات عن الصلاة في وقتها .. و أهمية الصلاة .. توزعون عليهم أشرطة دينية و أناشيد تحث على الصلاة ..

- الفكرة (8 ) :

تسوون محاضرات و أنتوا اللي راح تلقونها على باقي البنات و المعلمات .. تسوولكم جدول كبير في لوحة و تعلقونها أمام المسرح مثلاً أو أي مكان تحسون فيه وااااااااااااضح و الكل يشوفه يوم يمر ..! تكتبون في الجدول .. قائمة بأسماءكم ( يعني اللي بتسوي المحاضرة منكم ) و قائمة بأيام المحاضرات و التاريخ .. و قائمة بعنوان المحاضرة اللي راح تلقونها .. بس لا تنسون التحضير للمحاضرة جيداً قبل البدء بها !

- الفكرة (9) :

تحطون على طول أيام الأسبوع قبل الإذاعة .. أناشيد عن الصلاة .. مثل : إلا صلاتي / قلي لماذا لا تصلي ؟ / و غيرهم من الأناشيد اللي تحث على الصلاة ... و الأفضل و الأحسن انهم يكونون ( بدون إيقااااااااااااااع و بدون دق أو ربشة ) .. ^_^

- الفكرة (10) :

تحاولون التنسيق مع الإدارة أو حد من المعلمات أو اي حد يساعدكم في إحضار محاضر أو شيخ كبير معروف عندكم يسوي محاضرة عن الصلاة و أهميتها مثلاً أو الصلاة على وقتها و غيره عن الصلاة .. و تكون المحاضرة وقت الفرصة أو الحصص الإضافية (اللي تكونون فيها فااضيين ) عسب يحاضر فيكم ..

-------------------------------

معرضنا بعنوان: الظل المنتظر.. وطبعا هو عن السبعة الذين يظلهم الله يوم لاظل إلا ظله..

"جعلنا الله منهم" ... من لديها أفكار دعوية أو تنسيقية .. تفيدنا ؟

أفكااااااااااااااااااري :

1- هالفكرة حلوة للديكور .. مم بالنسبة للأرضية .. اشتروا أوراق (قص ولزق) و ارسموا آثار أقدام .. و قصوهم و لصقوهم في أرضية المكان .. يعني مثلاً .. مكان المعرض أو تجمع الكل بيكون في المسرح .. لصقوا الآثار .. من بداية باب المسرح إلى الداخل .. (طبعاً بيكون في المسرح .. سبعة أركان .. لكل ركن حطوا له أثار .. من بداية المسرح إلى كل ركن ..)

2- و الديكور .. بالنسبة لليدار (الجدار) .. حطوا أقمشة ساتان أو مخمل .. بحيث تقصونهم على شكل مربع .. في مختلف الأماكن .. و تحضرون الفلين الصلب ( البوه ) و ترسمون عليه ( علامات استفهام ؟ و تعجب ! ) .. و كلمات مثل : ( من هو صاحب الظل ؟ / صاحب الظل .. تعالي لتعرفي سره ؟! / الظل المنتظر .. فلنعرف معاً ما هي خفاياه و أسراره ؟؟.... و هكذا يعني كلمات تشد الحاضرين) و تلونونهم بألوان على حسب ذوقكم .. باستخدام خامات القماش أو ألوان مائية و غيره .. و بعدين تلصقونهم على الأقمشة في بداية الفكرة ..

3- وضع أناشيد .. بالنسبة للركن اللي راح تشرفون عليه .. حطوا أناشيد تخصه مثل : - نشيدة : تاجي حجابي / نشيدة : ملكة الجمال / نشيدة : جمال الروح / حيوا الفتاة الداعية .. و غيرها

4- عرض موفي ميكر .. ممكن ترتبون أفكاركم بخصوص الموضوع اللي راح تطرحونه .. و تنسقونه بحيث يعرض على شكل موفي ميكر .. ( طبعاً أكثر تطوراً من الباور بوينت ^ ^ )و مثلاً تاخذين قصة : يوسف عليه السلام ( مثل ما ذكرت أحد الأخوات ) .. و تعرضينها .. بحيث كل فكرة في القصة .. تسويلها موقف واقعي في حياتنا .. يعني بين شباب و فتيات اليوم ! و بأسلوب مبسط حلو سلس ..

5- تسوون توزيعات للحاضرين .. و يكون عبارة عن سلات فيهم .. حلويات راقية من باتشي - فوالة - شوكولالا و غيرهم .. و تحطون معاهم .. بطاقات صغيرة .. تكتبون فيها .. عبارة أخوية لطيفة .. أو نصيحة بخصوص موضوعكن .. الأدوات اللازمة في عمل التوزيعات : - عنجلية أو العصي أو عيدان تنظيف الأسنان ( و تكون طوييلة ) ..- بطاقات صغيرة .. تصممونها و تغلفونها .. أو بدون تغليف ..- قطعة ساتان أو قطعة (كورنيش) ملونة للتزين ..- الحلويات أو الكاكاو ..الطريقة :- تحضرون العصا الطويلة .. و تحطون في مقدمتها قطعة صغيرة من الساتان أو الكورنيش . و بعدين حطوا فوق القطعة البطاقة و بعدين في النهاية حطوا قطعة الكاكاو .. و حتى لو تغيرون الطريقة بأسلوبكم .. و بشكل مرتب ..و ممكن تكون هناك سلات لتوزيعات : أشرطة محاضرات يخص موضوعكن أو حلويات و كاكاو و بطاقات و غيره - فكرة التوزيعات خلوها في بداية عرضكم للجمهور .. كضيافة لهم .. و كذلك هم بياخذون فكرة حلوة منكم ^_*

6- تسوون عمل مسرحي ( مثل ما قالت أحد الأخوات ) .. بس يكون ملامس لواقعنا اليوم . جددوا الفكرة و لا تخلونها كمشهد تمثيلي لقصة قديمة .. بالعكس جذه (هكذا) بتخلونهم يرقدون و يتمللون لأنه فكرة المشهد قديمة و مارة عليهم قبل !!

7- تشترون باقة كبيـــرة من الورود ( وتكون باقة جوري أحمر !__! ذكرت الجوري لأني أحبه ) .انزين .. و بعدين تحطون هالباقة في وسط مكان تجمعكم أو عرضكم لكل الأركان .. في وسط المسرح تقريباً .. أمام الجمهور .. و للعلم .. هالباقة لازم تتكون من 7 باقات صغيرة (داخلها) .. و بشكل مرتب و منسق .. شو فكرة هالباقة الكبيرة ......................؟؟!!!!!!!!!!! الفكرة كالتالي : انه كل بنات من ركن معين .. يوم يخلصون عرض فكرتهم أو موضوعهن .. تكون هناك جماعة أو لجنة مسؤولة عن تكريمهم .. بإعطاءهم باقة من الباقة الكبيرة !* كمثـال .. في جماعة خلصت طرح موضوعها و فكرتها .. تأتي اللجنة المسؤولة لتكريمها .. فتقول :ما شاء الله .. تبارك الله .. جهد كبير منكن أخواتي .. جزاكن الله خير .. تفضلن هذه الباقة تقديراً لعملكن الدؤوب و جهدكن الطيب ^_^ .. ( يعني تدعيلهم أمام الجمهور و تهديهم باقة ) >>> حسيت نفسي ويااكم ^ ^^^ فكرة طازجة توها ظهرت في مخي !

8- تسوون مجسم ..!!! كيف ؟؟؟؟؟؟! تحضرون بوه ( قطعة فلين صلبة كبيرة ) و تحطونها أمام الحاضرات .. و تكتبون في بدياته .. بداية الحديث : عن أبي هريرة رضي الله عنه عن النبي صلى الله عليه وسلم قال : " سبعة يظلهم الله في ظله يوم لا ظل إلا ظله....) .. و تكون المساحة اللي تحت فاضية ! ..و كل جماعة اللي في السبع أركان .. يكون عندها لوحة .. كل مجموعة تكتب في هاي اللوحة .. أحد السبعة الذين يظلهم الله تحت ظله يوم لا ظل إلا ظله .. مثال : اللوحة الأولى .. إمام عادل " الثانية .. شاب نشأ في عبادة الله" الثالثة ..........و هكذاو بعدين .. كل ما خلصت مجموعة من المجموعات السبع عرض موضوعها و أفكارها .. تأتي في الوسط لتضع هذه البطاقة في (البوه) .. من خلال ( دبوس أو تيب أو غيره ) بطريقة مرتبة .. إلى أن تكتمل اللوحة .. بذكر الحديث كاملاً .. و تطلبون من أحد الحاضرات قراءته عليكم كاملاً .. فكرة أخرى .. ممكن بعد ما تكتمل لوحة البوه .. انكم تعطون الحاضرات فرصة ربع ساعة أو أقل .. لحفظ الحديث و تسميعه لكن .. و التي تحفظه بشكل صحيح ... لها جائزة قيمة ^_*

9- تطلبون من الحاضرات أو الجمهور .. انهم يذكرون موقف صار لهم أو معلومات يعرفونها بخصوص موضوعكم .. يعني تخلونهم يشاركونكم و يتفاعلون معاكم ..

10 - عمل مسابقات خفيفة في نهاية موضوعكم .. يعني من بعد ما يخلصون كل الأركان بطرح فكرتهم و عرضها .. تسوون مسابقة .. لأسئلة تخص الأفكار اللي طرحتوها أو أسئلة دينية عامة ..+و لا تنسون التحفيز و التشجيع سواء كان : مادي أو معني ..!المادي : طبعاً بالهدايا .. و حتى لو كانت بسيطة و لكن أثرها كبير إن شاء الله ^_^ .. مثل : مسابيح داخل علب ملونه / أشرطة محاضرات أو أناشيد (دون إيقاع ! ) / وردة جوري / و هكذا .. المعنوي : بقولكن لهن .. بارك الله فيكِ ../ لا حرمكِ الله الأجر ../ أحسنتِ يا غالية ../ سدَّد الله خطاكِ أخيتي ../ فكرة رائعة يا رائعة ../ جواب راااااااااائع .. و هكذا......

-------------------------------

عندنا نشاط للمدرسة عنوانه ( لغة الضاد ) .. أتمنى تفيدوني بأفكاركم وإبداعاتكم ؟؟

أفكااااااااااااااااااري :


1- عمل بطاقات منسقة و مصممة من خلال برنامج الفوتوشوب .. أو على أوراق a4 تكتبون على كل بطاقة أو ورقة .. حرف من حروف الهجاء و بشكل كبير .. و ممكن تكتبون تحته بخط صغير : نبذة عن الحرف أو معلومات عنه أو بيت شعري يبدأ فيه أو او و و و و .. الخ / و تعلق كل بطاقة على كل طالبة عندكم في الصف .. ( مثل ما يعلقون الميدالية على الرقبة ^ ^ )

2- تشترون ( بوه ) >> = قطعة فلين كبيرة و ترسمون عليها أحرف الهجاء .. مع ملاحظة انكم تسوون لكل حرف شخصية .. مثلاً : حرف الألف يكون فيه عيونين و رجلين و و و يعني كأنه شخصية أو كائن أو رسوم يعني .. و تلونونها بإبداعكم انتوا .. و تعلقونهم على يدار ( جدار ) المدرسة .. أو بين الصفوف ..

3 - عمل مسابقات ..
اقتباس

بس اذا بالامكان تبعدون عن فكرة المسابقات << لأن البنات مايتفاعلون فيها !

بالعكس ...................!!! منو قالج هالفكرة : !!! .. بالعكس البنات أكثر يتفاعلون مع المسابقات ، مع التركيز على التشجيع في البداية و التكريم في النهاية ! ^_^ .. يعني مم سووا مثلاً : - مسابقة : النقد الأدبي >>> يعني يكون هناك 3 مشاركات في المسابقة و تعطونهن نص أدبيّ و تطلبون منهم انه يسوون لهذا النص نقداً أدبياً بأسلوبهم .. دون مساعدة من أحد .. و تكون المسابقة على فترات .. كل فترة يصعب النص الأدبي و هكذا ..
- مسابقة : الشعر العربي >>> يعني تكون هناك هناك متسابقات و تخلونهم يؤلفون شعر عن موضوع معين .. و يكون كذلك على فترات و مراحل ..
و مسابقة ثانية للشعر .. انكم تطلبون من المشاركات بيت شعر و كل بيت ينتهي فيه الحرف . تبدأ به المشاركة الثانية .. و هكذا .. ( هذا اللي يسمونه بالمساجلة الشعرية أظن ^ ^" )
- مسابقة البحث عن الحرف الضائع : كل يوم تخبرون البنات انه هناك حرف ضائع من حروف اللغة العربية و يحتاج للمساعدة في البحث عنه ..! و تحطون خطوات على الأرض ( كحركة ) .. مم و تحطون بطاقات موزعة بين أرجاء المدرسة حتى يدورون عنها و يقرونها و يعرفون أثر الحرف الضائع ..
( لعمل الخطوات على الأرض : قصدي فيهم انهم ترسمون أرجل أو آثار أقدام على الأرض .. ( كيف ؟؟؟ )>> تشترون قص و لزق و ترسمون عليهم و تقصونهم .. و تلصقونهم في أماكن محددة ( حتى تكون كخطوات )

4 - تحطون أناشيد .. خلال الأسبوع . يعني قبل الطابور مع حضور الطالبات الصبح للمدرسة .. و طبعاً الأناشيد عن اللغة يمكن مب متوفرة .. يمكن راح تحصلونها بأسلوب خاص بالأطفال .. مم سمعت من قبل في التلفزيون برنامج عن اللغة العربية و الحروف اسمه ( لغتي ) أظن .. و كلمات نشيدته : لغتي .. لغتي .. لغة العُـرْبِ أبِــيــَّـة ../ و نشيدة ثانية أذكرها .. باسم الله .. باسم الله .. أحلى كلام تعلمناه >> مال طيور الجنة ^ ^ ( ممكن انها تنفع بالنسبة للغة العربية )

5 - توزعون بروشرات أو نشرات ( مثل بطاقات مطوية ) تسوونها بإبداعكم و بطريقة حلوة فنتوقية بنوتية .. حاولوا انكم تستخدمون برنامج الفوتوشوب و الخامآآت و البراشز و غيرهم .. يعطون شكل مرتب و ناعم و ذوق !

6 - عمل أوشحة ( جمع وشاح ) . >> ( قطعة قماش تلبسونها و تحطونها بشكل مائل مثل المتخرجين عرفتيها ؟؟) و تكتبون على كل وشاح حرف من حروف الهجاء مع بيت شعري يدل عليه أو حكمة أو مقولة أو مثل .. و وو

7 - تشترون وقي أو شِـيـَـل ( جمع وقاية - شيلة ) من محل العبي ( العابايات ) طبعاً .. و يكونون على عدد بنات صفكم أو البنات المشاركات معاكم .. و تشترون قطعة مخمل لاصق ( من المكتبة ) لون سادة بعد .. على حسب ذوقكم .. المخمل يكون أحمر أو أزرق أو أو او و و و .. بس يفضل يكون مع نفس لون المريول ( زي المدرسة عندكم ) .. إذا المريول أزرق اشتروا المخمل أزرق .. أحمر - أحمر و هكذا .......و قصوا المخمل دوائر متوسطة و اكتبوا على كل دائرة حرف من حروف الهجاء .. أو صفة من الصفات .. أو كلمات حلوة مثل : إبداع - تميز - إرتقاء - تفاؤل - طموح - ثقة - همة عالية - و و و و وووو عقب لصقوا مجموعة من الدوائر اللي قصصتوها و كتبتوا عليها على الوقاية أو الشيلة ( بشكل عشوائي ) .. و كل وحدة منكم تلبسهم في أسبوع ( لغة الضاد )
^^
* هالفكرة طبقناها في مرحلة الثانوية العامة و الكل عجبته و أثنى عليها الحمدلله ^___^

8 - هالأسبوع حاولوا انكم ترمسون ( تتكلمون ) باللغة العربية الفصحى .. يعني لا ترمسون بالعااامية أبداااااااااااا .. و سووا بينكم و بين كل بنات المدرسة لعبة .. أو معاهدة ! .. انكم كلكم تتكلمون الفصحى دون العامية لمدة أسبوع ( لغة الضاد ) .. و اللي تواصل معاكم إلى نهاية الإسبوع و تحسون انها أجادت اللغة الفصحى في حديثها مع الجميع .. كرموها في الإذاعة مع وسام ( تصنعونه أنتم بأنفسكم و بإبداعكم .. و يكون جميل و مرتب .. و تكتبون فيه مثلاً ممم : مبارك لكِ يا أخت الضاد - أو أهل الضاد - أو محبة من أحباب الضاد .. أو أو و وو و )

9 - تشترون وسيلة كبيرة .. أو عدة وسائل كبيرة .. و تحاولون انكم تشبكونهم أو تلصقونهم فوق بعض إلى أن تكون عندكم وسيلة بحجم كيييييييييييير أو ما يسمى بـ ( الحجم العائلي ) انزين .. و بعدين تحطونها في ساحة المدرسة .. أمام مرآى الطالبات و المعلمات و الكل .. حتى يشوفونها و هي واضحة .. و تكتبون في أعلى الوسيلة ( إهداء إلى لغة الضاد .. / أو . نحن نحبكِ يا ( لغة الضاد ) .. / أو أو و و و ) . و تطلبون من الكل سواء البنات أو المعلمات و حتى اللي في الإدارة انهم يكتبون إهداء للغة .. يعني مثلاً يكتبون بيت شعري أو مثل أو حكمة أو مقطع من نشيدة أو أو و و و .. يعني أي شي فيه فصحى بحت ! و بعيييييييييييد عن العامية !!

10 - سووا كاريكاتيرات مضحكة مليئة بالفكاهة أو تكون هادفة لها معاني .. حتى لو بأياديكم دون الكمبيوتر .. لأنه الرسم باليد بيطلع أحلى .. و كذلك التلوين .. مم كاريكاتيرات عن شوو ؟ الكاريكاتيرات تكون بين مثلاً ( اللغة العربية الفصحى و اللغة الإنجليزية ) .. و تحاولون انكم تخلون اللغة العربية هي الأجمل و هي الأكثر روعة و يعني تبينون ليش نحب اللغة العربية أكثر ؟ . لأنها لغة القرآن و لغة أهل الجنة ( حاولوا انكم ترسمون واحد أجنبي و واحد مسلم ماسك القرآن الكريم .. و و و وو من الرسومات .. يعني أبدعواااا قد ما تقدرون *_^

11 - تسوون ورشة عمل خلال أسبوع ( لغة الضاد ) .. كيف تكون هالورشة ؟؟ و كيف نشتغل فيها ؟؟؟تسوون في هالورشة عدة أعمال راح أذكرها مثل : محاضرة بسيطة أو ندوة عن اللغة العربية و ليش نحبها كلغة ؟ أو ( اختاروا عنوان ثاني يخص اللغة ) / تسوون أشغال يدوية .. ( انتوا و ابداعكم ^ ^) / تسوون أوراق عمل و توزعونها على البنات حتى يحلونها و تناقشونها معاهم .. بأسلوب عفوي أخوي بينكم ^_^ .. / تسوون جمعية بينكم أو تبرعات تجمعون فيها مبالغ نقدية من البنات و حتى من المعلمات .. و الهدف من هااذي التبرعات .. >>> بناء مدرسة لطلاب علم فقراء .. أو جامع أو معهد ديني .. ( حتى الكل يكسب أجر و ثواب ان شاء الله ) =")

^^طبعاً فكرة رقم (10) طبقوها في المسرح .. جمعوا كل البنات و المعلمات و حاولوا ترتبون وقت البدء في عمل هالأعمال .. في وقت الفرصة أو الفسحة (طبعا لازم تكون طويلة ) أو انكم تسوون الفعاليات في حصص إضافية و يكون الكل فاضي ما عنده حصص .. أو انه يكون يوم مفتوح عندكم ^_^

،

اذكروا الله و قولوا ما شاء الله ..!

.

( تمنيـــاتي للجميع بكل التوفيق و النجاح )

**